He Tauparapara nā Noki Te Poono Hai Mihi mā Te Kura o Te Teko
E noho ana au i te whatitoka o tōku whare a Te Ao Hou
Ka titiro ki te awa kōrero ō Rangitaiki
Ka rere arorangi au ki uta rā
Ko Waiparapara, ko Tuariki, ko Te Wairereahiahi ko Te Tāwera
Kia tau iho ki runga i te tihi o Putauaki
ki te kanohi titiro ō Ngāti Awa
E hāngai tonu taku hāere ki te riu o Kawerau
Mihi iho ana ki ngā tīpuna whare ki a Te Aotahi, ko Tama Tohutohu
Ko Te Rautahi, te kete poutama o Tūwharetoa
Neke whakararo atu ki te take rā o te maunga o Tūkoiro
kai raro ko Tohia-o-te-rangi
Ko ngā tīpuna whare, ko Waitaha-ariki-kore me Hine-te-ariki
Ko Te Ōmeka e
Kātahi koe ka porotiti kia whiti atu i te awa ki Hahuru ko Hinemotu
Whakamau tonu tō rere kia tae atu ki Whakapaukōrero
Kai raro ko Umutahi, ko Te Rama Apakura
te pūtake tipuna Rangiaohia ki a Rakauheketara Ko Ngāti Rangitihi
Huri tō kanohi ki te wahapū ō Tarawera ki Te Awa o Te Atua
Ki Oniao te tipuna whare ki a Tūwharetoa
e tū mokemoke ana
Hoki kōmuri mai tō hāere kia tae ki ngā pakitara ō Hākai-atua ki Kōkōhīnau
Tau rawa iho ki runga ō te maihi Ō’Ruataupare ko Waipunaarangi
me Te Ngawari ō Rangimuaiho, ko Te Pahīpoto e
Kātahi ka porotiti kia tae atu ki Hekerangi
Kai te taha whakaroto ko ngā tīpuna whare ko Uiraroa, Hinerauhuia, ko Tauwhitu - Ngāi Tamawera
Kai waho iti mai ko Tūteao, Te Whakaruru-mai-o-te-rangi ki a Ngā Maihi
Kai tua iti atu ko Ruaihona, ko Mahanga-i-te-rangi
Ko Ngāi Tamaoki, Ngāti Tarāwhai
Ka rere ake ki Te Māpou
Ko te nohoanga ō te ihi, o te mana, o te tapū, o Ngāti Hamua
Ko Putauaki te maunga, ko Rangitāiki te awa
Ko Ngāti Awa te iwi, ko Mataatua te waka
Ko Rongotangiawa te whare tipuna, ko Te Kiriwera hana te wharekai
Ko Te Rāhui te papa
Te Haahi Te Kooti Rikirangi te whakapono,
Ko Ngāti Awa ki Whakatāne, ko Ngāti Awa ki Rangitaiki
Ko Ngāti Awa ki Te Awa o te Atua
Tihei Mauri Ora!
Koinei te tauparapara i homaihia e te koroua a Noki Te Poono i te tau 2003, kia tohua atu ai ngā marae me ngā hapū ō Ngāti Awa ki Rangitaiki. He koroua kaha ki te hāpai i ngā mahi katoa ā tēnei kura, ki te hari hoki i ngā karakia o te Haahi Ringatū i roto o te kura, i a ia e ora ana. E koro, hoki wairua mai ki te āwhina i a mātau ngā mokopuna o te kura nei hei hikoi i ngā tapuwae ā kui mā, a koro mā, hei taka anō hoki i te ara e anga ai ki mua. E kore rawa mātau e warewaretia
Te Whakataukī ā Te Kura o Te Teko
"Tauaki te tū, taiki te rere, Ōkōrero kia mau"
24 Te Teko RoadP O Box 5, TE TEKO, 3167
Term 1 Tuesday, 31 January -Thursday, 6 AprilTerm 2 Monday, 24 April-Friday-30 JuneTerm 3 Monday, 17July to Friday-22 SeptemberTerm 4 Monday, 9 October-Wednesday, 14 December
Office Hours: 8.50am – 2.30pmMonday to Friday 8.50am to 2.30pmInterval 11.00am- 11.30amLunch 1.00pm- 1.30pm